కల్వకుర్తి పట్టణ ప్రభుత్వ హాస్టళ్లపై కలెక్టర్ ప్రత్యేక దృష్టి పెట్టాలి
కల్వకుర్తి పట్టణంలోని ప్రభుత్వ హాస్టళ్లలో విద్యార్థుల సమస్యలపై జిల్లా కలెక్టర్ ప్రత్యేక దృష్టి సారించాల్సిన అవసరం ఉందని విద్యార్థుల తల్లిదండ్రులు కోరుతున్నారు.
ప్రభుత్వ హాస్టళ్లలో పనిచేస్తున్న కొంతమంది వార్డెన్లు, సిబ్బంది విధులకు సంబంధించిన ఇన్టైమ్, అవుట్టైమ్, విధుల నిర్వహణ, హాస్టల్లో విద్యార్థుల పర్యవేక్షణ విషయంలో నిబంధనలను సక్రమంగా పాటించడం లేదని విద్యార్థులు, తల్లిదండ్రులు ఆవేదన వ్యక్తం చేస్తున్నారు.
ముఖ్యంగా కొంతమంది వార్డెన్లు వ్యక్తిగత కారణాలతో దీర్ఘకాలిక సెలవులు తీసుకుంటున్నారనే ఆరోపణలు వినిపిస్తున్నాయి. పై చదువులు చదువుకోవడం, ఇతర వ్యక్తిగత కార్యకలాపాలు లేదా వ్యాపారాలు నిర్వహించడం కోసం ఎక్కువకాలం హాస్టల్ విధులకు దూరంగా ఉంటే, ఆ సమయంలో విద్యార్థుల బాధ్యతను ఎవరు తీసుకుంటారనే ప్రశ్నను తల్లిదండ్రులు లేవనెత్తుతున్నారు.
ప్రభుత్వ ఉద్యోగంలో కొనసాగుతూ ఇతర కార్యకలాపాల కోసం తరచూ సెలవులు తీసుకోవడం నిబంధనలకు అనుగుణంగా ఉందా? అనే అంశంపై సంబంధిత అధికారులు సమగ్రంగా విచారణ చేయాలని వారు కోరుతున్నారు.
హాస్టళ్లలో చదువుతున్న విద్యార్థుల భద్రత, విద్య, భోజనం, ఆరోగ్యం, క్రమశిక్షణ వంటి అంశాలను నిరంతరం పర్యవేక్షించాల్సిన బాధ్యత సంబంధిత అధికారులపై ఉంటుంది. వార్డెన్ దీర్ఘకాలం విధులకు హాజరు కాకపోతే ప్రత్యామ్నాయంగా బాధ్యతలు ఎవరు నిర్వహిస్తున్నారు? విద్యార్థుల సమస్యలను ఎవరు పరిష్కరిస్తున్నారు? అనే విషయాలపై కూడా అధికారులు స్పష్టత ఇవ్వాల్సిన అవసరం ఉందని తల్లిదండ్రులు అంటున్నారు.
ఇప్పటికే ఎంతోమంది నిరుద్యోగులు ప్రభుత్వ ఉద్యోగాల కోసం ఎదురుచూస్తున్న పరిస్థితుల్లో, ప్రభుత్వ ఉద్యోగులు విధులను సక్రమంగా నిర్వహిస్తున్నారా? సెలవులు నిబంధనల ప్రకారమే మంజూరవుతున్నాయా? వ్యక్తిగత వ్యాపారాలు లేదా ఇతర కార్యకలాపాలు నిర్వహిస్తున్నారా? అనే అంశాలపై సంబంధిత శాఖ అధికారులు తనిఖీలు నిర్వహించాలని తల్లిదండ్రులు కోరుతున్నారు.
కల్వకుర్తి పట్టణంలోని ప్రభుత్వ హాస్టళ్లపై జిల్లా కలెక్టర్, ఎస్సీ సంక్షేమ శాఖ డీడీ ప్రత్యేక దృష్టి సారించి ఆకస్మిక తనిఖీలు నిర్వహించి, వాస్తవ పరిస్థితులను పరిశీలించాలని విద్యార్థుల తల్లిదండ్రులు కోరుతున్నారు.
విధుల్లో నిర్లక్ష్యం, నిబంధనలకు విరుద్ధంగా సెలవులు లేదా ఇతర అవకతవకలు ఉన్నట్లు విచారణలో తేలితే సంబంధిత అధికారులపై శాఖాపరమైన చర్యలు తీసుకోవాలని వారు విజ్ఞప్తి చేస్తున్నారు.
విద్యార్థుల భవిష్యత్తుతో ముడిపడి ఉన్న ఈ అంశంపై అధికారులు వెంటనే స్పందించి, ప్రభుత్వ హాస్టళ్లలో క్రమశిక్షణతో పాటు విద్యార్థులకు మెరుగైన వసతులు కల్పించేలా చర్యలు తీసుకోవాలని కోరుతున్నారు.
— అజయ్ కౌండిన్య,,కల్వకుర్తి వార్తలు
